ନବବର୍ଷର ପରଶ – ଶିବରାମ ସାହୁ

ନବ ବରଷର ନୂଆ ପରଶ

ତୁଷାର ମୋତିମାଳେ ସୁପ୍ରକାଶ,

ଶୀତରେ ଥରଇ ପ୍ରାତଃ-ପଉଷ

ବିଲେ ଶୋଭାପାଏ ଗୁଳ୍ମ ସୋରିଷ ।

          ଆସେ ନବବର୍ଷ ।

ଦୁଃଖୀ ରୋଗୀ ଭୋଗୀ ମନହରଷ ।।

ବରଷକେ ଥରେ ମନ ଉଲ୍ଲାସ

ଏକତା ସୂତ୍ରରେ ସରବେ ବଶ,

ମନକୁ ମନ ମିଳାଇବା ଆସ

ଝରାଇବା ହୃଦୁ ଭାବ-ପୀୟୂଷ ।

           ପାଳି ନବବର୍ଷ ।

ଘରେ ଘରେ ରଚିଯିବା ରାହାସ ।।

ଆରମ୍ଭ କରିବା ନବ ଅୟସ

ସୁଖ ସମୃଦ୍ଧିରେ ହସିବ ଦେଶ,

ସୁସ୍ଥ ନିରାମୟ ଜୀବନାଦର୍ଶ

ଲଭିବା ସରବେ ଦିବ୍ଯ ଆଶିଷ ।

             କରି ମନ ତୋଷ ।

ଭକ୍ତିରେ ପୂଜିବା ଜଗତଈଶ ।।

ଯାହା ଘଟିଗଲା ଦୁଃଖ ବିଶେଷ

ପୁରୁଣା ବରଷେ ଥିଲା ଯା’ କ୍ଳେଶ,

କରିଦେଇ ସବୁ ମନରୁ ଶେଷ

ସୁଆଗତ ଦ୍ଵି ହଜାର ବାଇଶ ।

           ମୁଖେ ଭରି ହସ ।

ଶୁଭେଚ୍ଛା ଜଣାଇ ଭୁଲିବା ରୋଷ ।।

ଶେଷରେ ଏତିକି କାମନା ଆଶ

ସଭିଁଙ୍କୁ ଦିଅନ୍ତୁ ସୁଖ-ସୁବାସ,

ରୋଗ ଶୋକ ଯେତେ ହେଉ ବିନାଶ

ଅଭିନନ୍ଦନ ମୋ ଘେନ ଅଶେଷ ।

             ନ ହୋଇ ନିରାଶ ।

ସମାଜେ ବିରାଜୁ ନବ ସନ୍ଦେଶ ।।

           ଶିବରାମ ସାହୁ

ରୁପ୍ରା, ନର୍ଲା

କଳାହାଣ୍ତି