ଦୀପ ଜାଳିବୁ କାହା ପାଇଁ – ଅଶୋକ କୁମାର ନାୟକ 

ଆମ୍ଭେ ଦୀପ ଜାଳିବୁ କାହା ପାଇଁ

କେଉଁ ସ୍ବାଭିମାନ ନେଇ, 

ସ୍ୱାଧୀନ ଏ ଦେଶ ସବୁଦିନ ଜଳେ 

ଝିଅଙ୍କର ଚିତା ଭାଇ ।

ସ୍ୱାଧୀନ ହେଇ ବି ପରାଧୀନ ଆମେ 

ଖୋଲି ପାରିବାନି ପାଟି, 

ନେତା ପରା ଆମ ଭାଗ୍ୟ ବିଧାତା 

ନୋହିଲେ ଚିପିବେ ତଣ୍ଟି ।

ଯୋଜନା କରନ୍ତି ସିନା ମାଳ ମାଳ 

ଚେଲା ଚାମଚାଏ ନେଲେ ବାଣ୍ଟି, 

ନେତାଙ୍କ ଭିତରେ ଚାଲେ କୋଳାକୋଳି 

ଆମ୍ଭ ମଧ୍ୟେ ଗଳା କଟାକଟି ।

ଚାରିପଟେ ଚିତା ଜଳୁଅଛି ଏଠି 

ଦର୍କାର ନାହିଁ ଦୀପ ଜାଳିବା,

କେଉଁ ରାକ୍ଷସକୁ ମାରି ଆମେ କୁହ 

ଆନନ୍ଦରେ ଆଜି ଦୀପ ଜାଳିବା ।

ଆଜିର ରାକ୍ଷସ ନିତି ବନ୍ଧା ହୁଏ

କାଲିକି ପୁଣି ସେ ଯାଉଛି ଖସି, 

ଆମ ଆଇନଟା କେମିତି କେଜାଣି 

ନିର୍ଦ୍ଦୋଷୀ ବେକରେ ଲାଗୁଛି ରଶି ।

ଦୀପାବଳି ଦିନ ଦୀପ ଜାଳିବାନି

ମନେ ମନେ ଆମ୍ଭେ କରିଛୁ ପଣ, 

ଆମ ଝିଅ ବୋହୂ ନିର୍ଭୟେ ବୁଲିଲେ 

ଦୀପଟେ ଜାଳିବୁ ଆମ୍ଭେ ସେଦିନ ।

ଆହେ ପିତୃଲୋକ ଅନ୍ଧାରେ ଆସିଛ 

ଆଲୋକ ଦେଖାଇ ଯିବା ପାଇଁକି, 

ବାଇଶି ପାହାଚେ ଦୀପାଳି ଜାଳୁଛୁ 

ଢାଳ ହେ ଆଶିଷ ଆମ୍ଭ ପାଇଁ କି ।

   ଅଶୋକ କୁମାର ନାୟକ 

         କେନ୍ଦୁଢି଼ପି, ନୟାଗଡ଼