Sahitya Jibana

Portal on odia literature

ନାରୀ ସଶକ୍ତିକରଣ – ଜଗନ୍ନାଥ ପଧାନ , ବରଗଡ଼

1 min read
seashore under white and blue sky during sunset


ନାରୀର ଚରିତ୍ର                    ଅଟଇ ବିଚିତ୍ର 
               ସଂସାର ସାଧନ ପାଇଁ ।
କେବେ କେଉଁ ଭାବେ           କେଉଁ ରୂପ ଧରେ 
               ବିଧିର ବିଧାନ ନେଇ ॥

ପ୍ରଥମ ପାହାଚେ                 କନ୍ୟା ରୂପେ ଆସେ 
                  ହସଖୁସି ଦିଏ ଭରି ।
ପରିବାର ଜନେ                    ସ୍ବାଗତ କରନ୍ତି 
               ଲକ୍ଷ୍ମୀ ଠାକୁରାଣୀ ପରି ॥

ଭାଇ ପାଇଁ ସୁନା                 ଭଉଣୀ ହୋଇ ସେ
              ସେନେହ ଶରଧା ଢ଼ାଳେ ।
ବାପାଙ୍କର ସିଏ                      ନୟନପିତୁଳି
              ମମତା ପାଏ ମା କୋଳେ ॥

ପ୍ରାପତ ବୟସେ                    ବାପ ଘର ଛାଡି
                 ଅଜଣା ଘରକୁ ଯାଏ । 
ଶାଶୁଘରେ ସୁନା                   ବୋହୂଟିଏ ହୋଇ
               ପତ୍ନୀଧର୍ମେ ବ୍ରତୀ ହୁଏ ॥ 

ଦଶମାସ ଗର୍ଭ                      ଧାରଣ କରି ସେ 
                ସନ୍ତାନ ଜନମ ଦେଇ ।
କେତେ କଷ୍ଟ ସହି                 ସନ୍ତାନ ପାଳନେ 
                ଜୀବନ ଉତ୍ସର୍ଗୀ ଥାଇ ॥

ବୃଦ୍ଧାକାଳେ ପୁଣି                  ଶାଶୁ ଭୂମିକାରେ 
                 ଅଭିନୟ ଥାଏ କରି ।
ପରିବାରକୁ ସେ                   ସୁନାର ସଂସାରେ 
                 ଗଢ଼ିଥାଏ ଯତ୍ନ କରି ॥

ଝିଅରୁ ଭଉଣୀ                     ପତ୍ନୀ ବୋହୂ ପୁଣି 
              ମାଆ ଓ ଶାଶୁମା’ ହୋଇ ।
ଦୁହିତା ପଦକୁ                     ସାର୍ଥକ କରେ ସେ 
              ନାରୀ ରୂପେ ଜନ୍ମ ପାଇ ॥

ଆଜିର ଯୁଗରେ                   କନ୍ୟା ଭ୍ରୃଣହତ୍ଯା 
                ଧର୍ଷଣ ଓ ନିର୍ଯ୍ଯାତନା ।
ଯୌତୁକ ଜନିତ                   ହତ୍ଯା ବ୍ଯଭିଚାର 
              ନାରୀ ତ ସହି ପାରେନା ॥

ନାରୀ ଆଜି ନିଜେ               ନିଜର ଶତ୍ରୁ ହେ 
              କାହାକୁ କହିବା ଭାଇ ।
ଝିଅ ଜନ୍ମ ହେଲେ                ତଣ୍ଟି ଚିପି ତା’ର 
              ନଈରେ ଦିଏ ଭସାଇ ॥

ହେ ନାରୀ ତୁମେ ତ              ସତୀ ମାତା ସୀତା 
               ଝାନ୍ସୀ ରାଣୀ ଲକ୍ଷ୍ମୀବାଈ ।
ଦୁର୍ଗା ଶକ୍ତିରୂପା                   ହୋଇ ବି ତୁମେ ଗୋ 
               ଅସହାୟ କାହିଁ ପାଇଁ ॥

ନାରୀର ହୃଦୟ                       ବିଶାଳ ସମୁଦ୍ର 
                 ପ୍ରଶାନ୍ତ ଆଉ ଗଭୀର ।
ଯେତେ ଝଡ଼ ଝଞ୍ଜା                 ଆସେ ତା ଜୀବନେ
               ହୁଏ ନା କେବେ ଅଧୀର ॥

ନାରୀ ଶକତିର                     କର ହେ ବିସ୍ତାର 
                 ସୃଷ୍ଟି କର ଜାଗରଣ । 
ଏକତା ବଳରେ                     ଦେଖାଅ ବିଶ୍ବକୁ 
                 ନାରୀ ସଶକ୍ତିକରଣ ॥

ନାରୀ ହିଁ ସୃଷ୍ଟିର                    ଆଦି ଆଉ ଅନ୍ତ 
                ନାରୀ କ୍ଷମାର ସାଗର ।
ହେ ମାନବଗଣ !                  ନାରୀ ଜାତି ପ୍ରତି 
                 କରିବନି ଅନାଦର ॥


ଜଗନ୍ନାଥ ପଧାନ 
ଖନ୍ଦା, ଲାଉମୁଣ୍ଡା, ବରଗଡ଼