★★★( ନାରୀ ସଶକ୍ତିକରଣ )★★★

ଯେବେ ସେ ପାଇଛି ତାର ପରିଚୟ
ସ୍ୱାଭିମାନେ ବଂଚିଅଛି ।
ଅବଳା ଦୁର୍ବଳା ନୁହେଁ ତା ଜୀବନ
ମଥା ଟେକି ରହିଅଛି ।।

ମାନ ଅପମାନ ସବୁ ସହି ଯାଇ
ପରକୁ ଆପଣା ମଣେ ।
ବଞ୍ଚିଥିବା ଯାଏଁ ସ୍ନେହ ଶ୍ରଦ୍ଧା ଭକ୍ତି
ଭରି ଥାଏ ମନେ ପ୍ରାଣେ ।।

କେତେ ରୂପେ ଆଜି ରହିଛି ଜଗତେ
ନାହିଁ ଯେ କଳନା ତାର ।
ସ୍ତ୍ରୀ, ମାତା, ଝିଅ, ଭଗିନୀ ରୂପରେ
ରହିଥାଏ ସଭିଙ୍କର ।

କେବେ ସୀତା ପୁଣି କେବେ ସେ ଦ୍ରୋପଦୀ
କେବେ ଭାଗବତ ଗୀତା ।
ସଦା ସତ୍ୟ ପଥେ ପଥିକ ସାଜିଛୁ
ନଇଁ ନାହିଁ କେବେ ମଥା ।

କେବେ ଦୁର୍ଗା ରୂପେ ପୂଜା ପାଏ ନିତି
ଶତ୍ରୁକୁ ସଂହାର କରି ।
କାଳିକା ରୂପରେ ରହିଛି ଜଗତେ
ଅନ୍ଧାରକୁ ନାଶ କରି ।

କେତେ ବୀର ପୁତ୍ର ଜନମୀ ତୋ କୋଳେ
ଜୀବନ ହୋଇଛି ଧନ୍ୟ ।
ପୁଷ୍ପବୃଷ୍ଟି ହୁଏ ତୋ ପଦ ଚରଣେ
ପାଉଛୁ ବହୁ ସମ୍ମାନ ।

ଧରତୀ ମାଁ ପରି ସହନଶୀଳତା
ଗୁଣରେ କିଏ ବା ସରି ।
ବିଶ୍ୱ ବ୍ରହ୍ମାଣ୍ଡକୁ ଦେଇଛୁ ଆସ୍ଥାନ
ଜଗତ ପାଳୁଛୁ ଧରି ।

ନିଜ ବକ୍ଷ ଚିରି ସୁନା ଫଳେ କ୍ଷେତେ
ଶରୀରେ ଦେଇଛୁ ପ୍ରାଣ ।
ଧନ୍ୟ ତୋର ଏଇ ମହତ ପଣିଆ
ଜଗତେ ପାଉ ସମ୍ମାନ ।

ଦେଶ ଜାତି ହିତେ ନିଜକୁ ସମର୍ପି
ସାଜିଥାଉ ଦୀପ ଶିଖା ।
ତୋର ଜୀବନର ସଫଳ କାହାଣୀ
ସ୍ୱର୍ଣ୍ଣ ଅକ୍ଷରରେ ଲେଖା ।

ଆକାଶ ମାର୍ଗରେ ଦେଖାଉ ବୀରତ୍ୱ
ଚନ୍ଦ୍ରପୃଷ୍ଠେ ତୋର ନାମ ।
ଛାତି ଫୁଲିଉଠେ ଦେଖି ତୋ ସାହସ
କରିଅଛୁ କେତେ କାମ ।

ନୁଆଁ ବହୁ ସାଜି ଘରକୁ ଆଦରି
ସୁଖେ ତାର ଦିନ କଟେ ।
ନାରୀର ମହତ୍ତ୍ୱ ନୁହେଁ ଯେ କେବଳ
ସତ୍ୟକୁ ନିଇତି ଭେଟେ ।

ନିଜ ବୁଦ୍ଧି ବଳେ ଆଜି ତୁ ସବଳା
ଧନ୍ୟ ତୋର ପ୍ରଚେଷ୍ଟାକୁ ।
ସବୁ କ୍ଷେତ୍ରେ ତୋର ରହିଛି ଭୂମିକା
ଇତିହାସ ରଚିବାକୁ ।

ସିଏ ସର୍ବଂସହା ପୁଣି ଉଦାରତା
ସିଏ ପରା ମନ୍ଦାକିନୀ ।
ତା ଗୁଣ ମହିମା ଚିର ବନ୍ଦନୀୟ
ଜଗତର ବିଜୟିନୀ ।

ଆଶିଷ କୁମାର ବାରିକ
ଶିକ୍ଷକ
ସରକାରୀ ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟ, ବାହାବଲ
ସିହିନୀ, ବେଳପଡା, ବଲାଙ୍ଗୀର
9938330874, 9438051786