କୃଷକ

କରେ ମୁଁ ହଳ ଖାଏ ପଖାଳ
ସକାଳୁ ଉଠେ ବଡ଼ ସଅଳ
ସହି ପାରେନା ପ୍ରାଣୀ ବିକଳ
ଦାନା ମୁଠାଏ ଦିଏ
ମୁହିଁ କୃଷକ ଟିଏ।।

ମାଟି ମୋହର ଇଷ୍ଟ ଦେବତା
ଯତନ ନିଏ ଗଛ ଓ ଲତା
କାମରେ ବ୍ୟସ୍ତ ଥାଏ ସର୍ବଦା
ସ୍ଵାଭିମାନ ରେ ଥାଏ
ମୁହିଁ କୃଷକ ଟିଏ। ।

ସରଳ ମୋର ଜୀବନ ଶୈଳୀ
ଦେହରୁ ଘର୍ମ୍ୟ ଗଲେବି ଗଳି
ମନ ମୋ ଯାଏ ନାହିଁ ଝାଉଁଳି
ଖୁସି ମନରେ ଥାଏ
ମୁହିଁ କୃଷକ ଟିଏ।।

ସବୁଜ ଖତ ମାଟିର ସାଥ
ଉନ୍ନତ ମାନ କରାଇ କ୍ଷେତ
ଆଦାୟ କରେ ଶସ୍ୟ ବହୁତ
ଭୋକିଲା ପେଟେ ଦିଏ
ମୁହିଁ କୃଷକ ଟିଏ।।

ବାର ମାସର ତେର ପରବ
ପରମ୍ପରା ଟି ମୋର ଗରଵ
ପାଳନ କରି ଥାଏ ସରବ
ଖୁସି ବହୁତ ହୁଏ
ମୁହିଁ କୃଷକ ଟିଏ। ।

ବରଷା ଏବେ ଯାଉଛି ଛାଡ଼ି
ଋଣ କରଜେ ଯାଉଛି ବୁଡି
ତଥାପି କର୍ମ ଦେଉନି ଛାଡ଼ି
ଆଶା ଟି ବାନ୍ଧି ଥାଏ
ମୁହିଁ କୃଷକ ଟିଏ।।

ଗଛ ମୋହର ପରମ ମିତ୍ର
ତାର ବିହୁନେ ନାଶ ଜଗତ
ସର୍ବେ ବୃକ୍ଷକୁ ନେବା ଜାଗ୍ରତ
ବାର ବାର ମୁଁ କହେ
ମୁହିଁ କୃଷକ ଟିଏ।।


ରାମ ଚନ୍ଦ୍ର ମହାନ୍ତି
ଗ୍ରାମ ବାଣତୁମ୍ବ
ପୋଷ୍ଟ ବେଲଗୁଣ୍ଠ
ଜିଲ୍ଲା ଗଞ୍ଜାମ
ପିନ୍ କୋଡ ୭୬୧୧୧୯
ଓଡ଼ିଶା।