★★★( କୃଷକ )★★★

ମାଟିର ମଣିଷ ଦେଶ ଜାତି ହିତେ
ସମର୍ପି ଦିଏ ତା ପ୍ରାଣ ।
ସହି ଯାଏ କେତେ ଦୁଃଖ ଓ ଯନ୍ତ୍ରଣା
ହୃଦୟକୁ କରି ଟାଣ ।।

ଖରା, ବର୍ଷା, ଶୀତ ଖାତିର ନକରି
କରୁଥାଏ ଚାଷ କାମ ।
ନିଜ ମୁଣ୍ଡ ଝାଳ ତୁଣ୍ଡରେ ମାରିଣ
ନିତ୍ୟ କରୁଥାଏ ଶ୍ରମ  ।।

ନିଜ କର୍ମ ବଳେ ଯୋଗାଏ ଆହାର
ଜଗତ ଭୁଞ୍ଜଇ ହସି ।
ଏ କି ଭାଗ୍ୟ ଲେଖା ତାହାରି ଜୀବନେ
ଦୁଃଖ ସହି ଦିଏ ଖୁସି  ।।

ଅକ୍ଷୟ ତୃତୀୟାରୁ ଆରମ୍ଭେ ବୁଣା
ହୋଇଣ ହରସ ମନ ।
ମାଁ ସମଳେଇ ଠାରେ ପ୍ରଥମ କରି
ଲାଗିଥାଏ ନୁଆଁ ଧନ ।।

ଧୋକା ଦେଇ ଯାଏ ଆଜିର ଦୁନିଆ
ବରଷାକୁ ଦିଏ ବାଧା ।
ବୃକ୍ଷ ଲତା ନାଶେ ଜଳର ସଙ୍କଟ
ଆଶାକୁ କରୁଛି ଅଧା ।।

ଟାଆଁ ଟାଆଁ ଖରା ମାଟି ଦିଏ ଚିରି
ମଞ୍ଜିରୁ ଗଜା ନ ଉଠେ ।
ଜୀବନ ବଂଚିବା ହୁଏ କଷ୍ଟକର
ଓଦା କନା ଦିଏ ପେଟେ ।।

ଅର୍ଥର ଅଭାବେ ପୁଅ ଝିଅ ତାର
ପାଠ ପଢା ଛାଡିଲେଣି ।
ନିଜ କଥା କଣ କାହାକୁ କହିବ
କରଜ ଦେଉନି ଧନୀ ।।

ତଥାପି ବଞ୍ଚିଛି ମଣିଷ ପଣିଆ
ଯିବି ନାହିଁ କେବେ ହାରି ।
ସବୁଜ ସୁନ୍ଦର ଶସ୍ୟ ଶ୍ୟାମଳାରେ
ଜଗତକୁ ଦେବ ଭରି ।।

---------------------------------------------
ଆଶିଷ କୁମାର ବାରିକ
ସିହିନୀ, ବେଳପଡା, ବଲାଙ୍ଗୀର
9938330874 / 9438051786
****************************