'ନାରୀ ସଶକ୍ତିକରଣ'
ସଭ୍ଯତା ରଥର ଚକ ଦୁଇଗୋଟି
ଗୋଟେ ନର ଗୋଟେ ନାରୀ
ଗୋଟେ ଚକ ଯଦି ନଷ୍ଟ ହୋଇଯାଏ
ପ୍ରଗତି ହେବ କିପରି ?୧।
ବିଶ୍ୱନିୟନ୍ତାଙ୍କ ସୃଷ୍ଟି ପ୍ରକ୍ରିୟାରେ
ପୁରୁଷ ଭୂମିକା ଯେତେ
ନାରୀ ବିନା ସୃଷ୍ଟି ଅସମ୍ଭବ ସିନା
ଏହା ଜାଣନ୍ତି ସମସ୍ତେ ।୨।
ନାରୀ ଯେଉଁଠାରେ ପୂଜା ପାଇଥାଏ
ସେଇଠି ଦେବଙ୍କ ବାସ
ନାରୀଙ୍କୁ ସନ୍ତୁଷ୍ଟ କରିପାରେ ଯିଏ
ପୂର୍ଣ୍ଣ ହୁଏ ତା'ର ଆଶ ।୩।
ନାରୀ ଶକ୍ତିମୟୀ ନାରୀ ସ୍ନେହମୟୀ
ମମତାମୟୀ ଜନନୀ
ମମତାର ଡୋରେ ବାନ୍ଧିପାରେ ନରେ
ପିତା ସ୍ୱାମୀ ପୁତ୍ର ଜାଣି ।୪।
କେତେ ମହୀୟସୀ କେତେ ଯେ ବିଦୂଷୀ
ଗାର୍ଗୀ,ଲୋପାମୁଦ୍ରା,ଘୋଷା
ରାଣୀ ଲକ୍ଷ୍ମୀବାଈ,ଦୁର୍ଗାବତୀ,ମୀରା
ବିଶ୍ୱବାରା,ମଦାଳସା ।୫।
ମାତା ଜିଜାବାଈ,ରାଣୀ ଯେ ପଦ୍ମିନୀ
ଇନ୍ଦିରା ଗାନ୍ଧି,କଳ୍ପନା
ତାଙ୍କ କର୍ମନିଷ୍ଠା,ତ୍ଯାଗ ପରାକାଷ୍ଠା
ଦେଶ କରୁଛି ବନ୍ଦନା ।୬।
ଆଜିର ପୁରୁଷ ପ୍ରଧାନ ସମାଜେ
ବଦଳେ ନାରୀର ସ୍ଥିତି
କନ୍ଯା ଭ୍ରୂଣହତ୍ଯା ଆଉ ବଳାତ୍କାର
ନାରୀ ମନେ ଜାଗେ ଭୀତି ।୭।
ଶୁଣ ହେ ମାନବ ପୁରୁଷ ପୁଙ୍ଗବ
ଘେନ ତୁମେ ଏହି ଦୀକ୍ଷା
ଚାହଁ ଯଦି ତୁମେ ସଭ୍ଯତା ପ୍ରଗତି
ନାରୀର କର ସୁରକ୍ଷା ।୮।
ମହିଳା ସଶକ୍ତିକରଣ ନାମରେ
ହୋଇଛି କେତେ ଆଇନ
ନାରୀର ମଙ୍ଗଳ ସାଧନ ସକାଶେ
ଯୋଜନା ଯେ କନ୍ଯାରତ୍ନ ।୯।
ଶୁଣ ହେ ମାନବ ଘେନି ଶୁଦ୍ଧ ଭାବ
ନାରୀକୁ କର ସମ୍ମାନ
ସାହସ ବଢ଼ାଇ ଦିଅହେ ପ୍ରେରଣା
ହେଉ ସଶକ୍ତିକରଣ ।୧୦।
****************************
ଶିବ ପ୍ରସାଦ ହାତୀ
ବିଜାଢୋଲ,ଝାରବନ୍ଧ,ବରଗଡ଼
0 Comments