କାର୍ଗିଲ୍ ବିଜୟ ଦିବସ
        ---------------------------
କାର୍ଗିଲ ବିଜୟ ଦିବସର ଗାଥା
ଗାଏ ବିଶ୍ବେ ଇତିହାସ
ଉଣେଇଶ ଶହ ଜୁଲାଇ ଛବିସ
ରଖି ଯାଇଛନ୍ତି ଯଶ।।
ମନେ ପଡିଗଲେ ସେଦିନର କଥା
ହୃଦୟ ବିଦାରି କୋହ
ସ୍ୱାଭିମାନ ଟେକ ରଖିଗଲେ ବୀର
ଢାଳି ନିଜ ଲହୁ ଲୁହ।।
ଭାରତ ଭୂ-ସ୍ୱର୍ଗ କାଶ୍ମୀର ନେବାକୁ 
ପାକିସ୍ତାନ ଷଡଯନ୍ତ୍ର
ହିମେ ଆଚ୍ଛାଦିତ କାର୍ଗିଲ ସାଜିଲା
ଭୟାବହ ରଣକ୍ଷେତ୍ର।।
ଅଟଳ ବିହାରୀ ପ୍ରତିଜ୍ଞା ଅଟଳ
ମୁଶାରଫ ଟଳମଳ 
ଭାରତୀୟ ବୀର ଏକତା ପାଖରେ
ହରାଇଲା ଥଳକୂଳ।।
ଅପରେସନ୍ ବିଜୟ ଅଭିଯାନ
ଧୈର୍ଯ୍ୟ ଓ ସାହସ ବଳେ
ବାୟୁସେନା ଆଉ ସ୍ଥଳସେନା ମିଶି
ବଇରୀକୁ ବିନାଶିଲେ।।
ମାତୃଭୂମି ମାଆ ଜାତୀୟ ପତାକା
ଟେକ ରଖିବାକୁ ଯାଇ
ଶତ୍ରୁର ବନ୍ଧୁକ ମୁନରେ ଆପଣା
ଛାତିକୁ ଦେଲେ ପତେଇ।।
ବୀରଭୂମି, ଶେଷ ରକ୍ତ ବିନ୍ଦୁ ଯାଏଁ
ଶୌର୍ଯ୍ୟ, ବୀର୍ଯ୍ୟେ ତୋ' ସନ୍ତାନ
ଶତସିଂହ ବଳେ କରିଲେ ବିଜୟ
ଦେଶକୁ ରଖି ଅକ୍ଷୁର୍ଣ୍ଣ।।
ଦେହରୁ ନିଗାଡି ଉଷୁମ ଶୋଣିତ
ଲୋମଟାଙ୍କୁରା ସେ ଯୁଦ୍ଧ
ଅମ୍ଳାନ ଅକ୍ଷରେ ରଚିଗଲେ ବିଶ୍ବେ
ସ୍ବର୍ଣ୍ଣାକ୍ଷରେ ଲିପିବଦ୍ଧ।।
କେତେ ବାପା ମାଆ କୋଳ ଶୁନ୍ୟ ହେଲା
ଲିଭିଲା ମଥା ସିନ୍ଦୁର
କେତେ ଶିଶୁ ପୁଣି ଅନାଥ ହୋଇଲେ
ଭଉଣୀଠୁ ଭାଇ ଦୂର।।
କର୍ମଜୟୀ ବୀର ମାଟିର ଗୌରବ
ସାକ୍ଷୀ ସେ' ସମର ଭୂଇଁ
ମାଟି ମାଆ ସ୍ୱାର୍ଥେ ସହୀଦ୍ ହୋଇଲ
ବିଜୟ ଧ୍ବଜା ଉଡ଼େଇ।।
ଫରଫର ଉଡ଼ି ପବିତ୍ର ତ୍ରିରଙ୍ଗା
ତୁମ ତ୍ୟାଗ ଗାଥା ଗାଇ
କହୁଛି ସହୀଦ୍ ତୁମେ ଚିରଞ୍ଜିବି
ଯୁଗେଯୁଗେ ମୃତ୍ୟୁଞ୍ଜୟୀ ।।
ଚିର ବନ୍ଦନୀୟ ବୀର ସନ୍ତାନଙ୍କୁ
ଅଶ୍ରୁପୂତ ଶ୍ରଦ୍ଧାଞ୍ଜଳି
ତ୍ୟାଗ ତିତୀକ୍ଷାର ମନ୍ତ୍ରରେ ଦୀକ୍ଷିତ
ହୋଇ ଦେବା ସର୍ବେ ମିଳି।।
ଆଜି ଏ' କାର୍ଗିଲ ବିଜୟ ଦିବସେ
ଦୀପଟିଏ ଜାଲିଦେଇ
ଅବିସ୍ମରଣୀୟ ମୁହୂର୍ତ୍ତକୁ ସ୍ମରେ
କୋହ ମିଶା ଅଶ୍ରୁ ଦେଇ।।
    ଈଶ୍ୱରୀ ବେହେରା
     ସୋର, ବାଲେଶ୍ବର ।