ଗୁରୁକୃପା
         *********

ଗୁରୁ ବ୍ରହ୍ମା,ବିଷ୍ଣୁ ,ଗୁରୁ ମହେଶ୍ୱର
ଗୁରୁ ଯେ ପରମେଶ୍ୱର ।
ପୁରୁଷୋଉତ୍ତମ  ପରମ ଠାକୁର
ପ୍ରଣମିବା ବାରମ୍ବାର ॥ (୧)

ଗୋବିନ୍ଦ ସଙ୍ଗରେ ଗୁରୁ ବିଜେ କଲେ
ଉଭୟେ ପୂଜ୍ୟ ପ୍ରବର,
ଗୋବିନ୍ଦ ପୂଜିଲେ ପ୍ରଭୁ ଯେ କହିବେ
ପୂଜ ତୋ ଗୁରୁ ପୟର ॥ (୨)

ମୋ ଠାରୁ ପବିତ୍ର ଉତ୍ତମ ଚରିତ୍ର
ତାଙ୍କୁ କିପରି ପାସୋରୁ ।
ମୋତେ ଚିହ୍ନିବାକୁ ସମର୍ପିଲା ଯେହୁ
ସେ ପରା ତୁମର ଗୁରୁ ? ॥ (୩)

ଅଖଣ୍ଡ ମଣ୍ଡଳ---  ଆକାର ଯାହାର
ସର୍ବ ବ୍ୟାପୀ ଚରାଚର,
ତାଙ୍କରି ଚରଣେ  ଶରଣ ପଶିବା
ସଦା ନତ କରି ଶିର ॥(୪)

ଅଜ୍ଞାନ ତିମିର ଅନ୍ଧକାରେ ଜ୍ୟୋତି
ଜ୍ଞାନ ଚକ୍ଷୁ ଫେଇକରି,
ତେଣୁ କରି ଗୁରୁ  ମଣିଷ ରୂପରେ
ମର୍ତ୍ତ୍ୟେ ଛନ୍ତି ଅବତରୀ ॥(୫)

ଗୁରୁଙ୍କ ମହିମା  ନାହିଁ ତା ଉପମା
ବର୍ଣ୍ଣିବା ନୁହେଁ ସହଜ,
ସାଗର ସରିବ  ବୃକ୍ଷ ମସି ହେବ
ପୃଥିବୀ ହେଲେ କାଗଜ ॥(୬)

ଗୁରୁ ସନ୍ଦିପନୀ ବଶିଷ୍ଠ, ବାଲ୍ମିକୀ
ବିଶ୍ୱାମିତ୍ର ବ୍ୟାସ ଦ୍ରୋଣ,
ଗୁଣ, ଜ୍ଞାନ, ବୁଦ୍ଧି  ବିଦ୍ୟା ବରଷିଣ
ଦେଲେ ଶିଷ୍ୟେ ଦିବ୍ୟଜ୍ଞାନ ॥ (୭)
                     (୨)
ବିନୟ ଆଚାର  ବିଧିର ବିସ୍ତାର
ବିବେକ, ବିଚାର, ଜ୍ଞାନ,
ବିକାଶ ବିଭବ  ବିରତ୍ୱ,ବ୍ୟକ୍ତିତ୍ୱ
ବିଶ୍ୱହେଲା ମହୀୟାନ ॥(୮)

ଗୁରୁ ପଦ୍ମ ପାଦ  ବିପଦେ ସଂପଦ
ବନ୍ଦନା କଲେ ଚରଣ,
ବର୍ଷି କୃପା ବୃଷ୍ଟି  ବିସ୍ତାରଣ ସୃଷ୍ଟି
ବିଶ୍ୱ ବାସୀ ହେବେ ଧନ୍ୟ ॥(୯)

ଗୁରୁ ଗୁଣ ଗାନ  କଲେ ପ୍ରତିଦିନ
ଅଶେଷ ଆନନ୍ଦ ମିଳେ,
ଜ୍ଞାନ ଚକ୍ଷୁ ଫେଇ  ଅଜ୍ଞାନ ଅନ୍ଧାରେ
ଜ୍ଞାନର ଆଲୋକ ଜଳେ ॥(୧୦)

ଆଦେଶ ତାଙ୍କର  ଅଟେ ଆଶୀର୍ବାଦ
ଅହଂକାର ହୁଏ ଦୂର,
ଅନୁକମ୍ପା ପାଇ  ଅଚିରେ ଲଭିବ
ଅତ୍ୟନ୍ତ ସୁଖ ସଂଭାର ॥୧୧॥

ଆଜି କିନ୍ତୁ ଗୁରୁ  ଅସହାୟ ନିସ୍ୱ
ଅତ୍ୟଧିକ ଅପମାନ,
ଆସ ପ୍ରିୟ ଶିଷ୍ୟ  ଅରଜିବା ଯଶ
ଆତ୍ମ କରି ନିବେଦନ ॥୧୨॥

ସେବା,ଭକ୍ତିଭାବ  ଶ୍ରୀପୟରେ ଦେବ
ଶ୍ରୀମୁଖ କରି ଦର୍ଶନ,
ସ୍ନେହ, ଶ୍ରଦ୍ଧା, ପ୍ରେମ  ସମର୍ପି ସମ୍ମାନ
ସନ୍ତୋଷ, ଦକ୍ଷିଣା ଦାନ ॥୧୩॥

ଗୁରୁକୁଳ ଗର୍ବ  ଗାରିମା ବଢିବ
ଗରୀୟାନ ହେବ ଜ୍ଞାନ,
ଗଗନ ବିହାରୀ  ଗହନ ସଙ୍କଟୁ
ଗୁରୁକୃପା ବିନା ହୀନ ॥୧୪॥
     କର ଗୁରୁ ପାଦେ ଲୀନ
     ଜୀବନ ହୋଇବ ଧନ୍ୟ
       କରି ଗୁରୁ ଗୁଣ ଗାନ
**********************
ଅଜିତ୍ କୁମାର ତ୍ରିପାଠୀ(ଶିକ୍ଷକ)
  ଭଞ୍ଜଭୂମି , କୁଲାଡ , ଗଞ୍ଜାମ
ଭ୍ରାମ୍ୟଭାଷ - ୯୪୩୮୧୮୯୯୪୮
**********************